Auroritetet kolumbiane shpenzuan 6 muaj duke mbledhur prova materiale që çuan në lëshimin e 13 urdhër-arresteve për anëtarët e dyshuar të një rrjeti të trafikimit të njerëzve që kalonte kufijtë në vende të tilla si Shqipëria, Kroacia, Mali i Zi dhe Kosova. Gazeta vendase

“El Tiempo” shkruan se ky ishte një rrjet transnacional i specializuar në rekrutimin, transportimin dhe shfrytëzimin seksual të vajzave, kryesisht kolumbiane, të cilat dërgoheshin në vendet evropiane me premtime të rreme për punësim. Pasi dërgoheshin jashtë vendit, ato u nënshtroheshin kushteve të skllavërisë seksuale.

Gjatë hetimit, u identifikuan 60 vajza kolumbiane të trafikuara ku pjesën më të madhe e ka Shqipëria me 44 të tilla. Më pas vijnë Kroacia (5), Bahreini (4), Kosova (3) dhe Mali i Zi (4). Midis grave që u mashtruan 19 u identifikuan nga qyteti Valle del Cauca, por kishte edhe nga Medellín, etj.

13 persona u arrestuan në Medellín dhe Envigado, Cali dhe Pereira. “Viktimat u detyruan të merrnin përsipër një borxh fillestar prej 5,000 eurosh, gjoja për shpenzimet e pasaportës, biletës dhe akomodimit.

Ky borxh u bë i papagueshëm për shkak të vjedhjes sistematike të të ardhurave të tyre nga shfrytëzuesit, të cilët gjithashtu vendosnin gjoba të vazhdueshme, duke i mbajtur ato në një gjendje skllavërie dhe kontrolli ekonomik”, – tha William Castaño Ramos, komandant i Policisë Metropolitane të Aburrás.

Ai shpjegoi se, sipas hetimit, u vërtetua se organizata kishte lidhje operative në Greqi, Kroaci, Shqipëri, Kosovë, Maltë, Mal të Zi dhe Bahrein dhe vepronte përmes rrjeteve të paligjshme që shfrytëzonin cenueshmërinë e grave të reja. “Ne kryem një nga operacionet më të mëdha kundër trafikimit të qenieve njerëzore për shfrytëzim seksual nga Kolumbia në Evropë”, deklaroi ai.

Hetimi tregoi se Lukas Giraldo Betancur ishte kreu i rrjetit kriminal. Me shtetësi të dyfishtë kolumbiane dhe malteze dhe rezidencë në Evropë, dyshohet se financoi marrjen e pasaportave, vizave, biletave dhe akomodimit për viktimat.

Ai gjithashtu përdori statusin e tij të emigrantit për të krijuar letra ftesash të rreme, të cilat i përdori për të lehtësuar hyrjen e vajzave në vende si Malta dhe Kroacia.

“U vërtetua se ai drejtonte aktivitetet e paligjshme në shoqërinë e babait të tij, i cili thuhet se ndodhej në Maltë. Deri më tani, janë identifikuar 60 viktima kolumbiane të rrjetit, në vende si Gjermania, Kroacia, Kosova dhe Mali i Zi. Disa prej tyre u abuzuan seksualisht me të mbërritur në destinacionet e tyre ndërkombëtare, ku u detyruan të kryenin midis 15 dhe 20 akte seksuale në ditë. Disa nga gratë raportuan se ishin infektuar me sëmundje të ndryshme seksualisht të transmetueshme dhe kishin përjetuar efekte serioze në shëndetin e tyre fizik dhe mendor”, – tha Gjenerali Castaño. /LAPSI.al