Kryetari i Partisë Mundësia, Agron Shehaj ka denoncuar atë që po ndodh me aeroportin e Vlorës duke e quajtur një kryevepër korruptive me tre akte. Për këtë aferë, Shehaj thekson se përgjegjës janë kryeministri Edi Rama dhe zv.kryeministrja e njëherazi Ministrja e Infrastrukturës, Belinda Balluku.

Në një video në rrjetet sociale, Shehaj shpjegon se kryeministri Rama dhe ministrja Balluku po kërkojnë të marrin në zotërim shumicën e aksioneve në aeroportin e Vlorës.

Kreu i Mundësia argumenton se akti i parë korruptiv ishte gara fiktive për koncesionin e aeroportit. Që në fillim, koncesioni për aeroportin e Vlorës kishte një fitues të paracaktuar, Behgjet Pacollin, kompaninë turke YDA Group dhe Valon Ademin, të cilët ofruan 108 milionë euro për ndërtimin e këtij projekti. Por në garë me Pacollin ishte një kompani angleze e cila dha një ofertë shumë më të vogël, 80 milionë euro për ndërtimin e aeroportit. Përjashtimi i saj nga gara bëri që kompania angleze t’i drejtohet Prokurorisë së Posaçme dhe SPAK të niste hetimet.

Akti i parë ka qenë përcaktimi i fituesit. Për Aeroportin e Vlorës paraqiten dy oferta, një vjen nga Pacolli, kompania turke dhe Ademi, të cilët ofrojnë 108 milionë euro për të ndërtuar Aeroportin e Vlorës dhe tjetra vjen nga një kompani angleze e cila ofron 80 milionë euro për të ndërtuar aeroportin.
Çfarë bën Edi Rama dhe Balluku? Largojnë kompaninë angleze duke e skualifikuar dhe shpallin fitues Pacollin me ortakët e tij” – shprehet Shehaj.

Shehaj thotëse pastaj vjen akti i dytë korruptiv. Sipas kreut të Mundësia, me dijeni të Qeverisë dhe firmën e ministers Balluku, kompania turke e cila kishte certifikimin për të ndërtuar aeroportin, shiti 40% të kuotave te Behgjet Pacolli për vetëm 4 mijë euro.

“Praktikisht pas kësaj shitjeje qartësisht fiktive, e autorizuar nga Balluku, me autorizim zyrtar, Pacolli ka 98% të kuotave dhe Ademi ka 2% të kuotave. 

Ky është akti i dytë, largimi i kompanisë turke”, thekson Shehaj.

Sipas kryetarit të Partisë Mundësia, ajo që po ndodh sot në aktin e tretë të një afere korruptive me bekimin e kreut të qeverisë, është se ortaku i Pacollit, Ademi, ka kërkuar në gjykatë konvertimin e një detyrimi financiar të pretenduar prej tij ndaj aeroportit të Vlorës prej 15 milionë euro në aksione të kompanisë koncesionare të Aeroportit të Vlorës.

“Praktikisht Ademi me Ramën dhe Ballukun nuk duan më thjesht 49% të kuotave sic në fakt Pacolli e ka njohur këtë detyrim por duan shumicën e aksioneve dhe ky është akti që ne po jetojmë sot: largimin e Pacollit”, thekson Shehaj i cili kërkon që Prokuroria e Posaçme SPAK të nxjerrë para drejtësisë ata që kanë abuzuar me këtë aferë korruptive.

“Presim që SPAK të bëjë detyrën dhe të nxjerrë para drejtësisë të gjithë ata që kanë abuzuar me këtë aferë korruptive”.