Brigitte Macron po përballet me një padi ligjore nga disa organizata, përfshirë grupet e të drejtave të grave, pasi u filmua duke thënë se protestueset feministe në një shfaqje teatrale në Paris ishin “budallaqe të ndyra”.

343 gra, një numër historikisht simbolik në feminizmin francez, ngritën këtë javë një padi kundër zonjës së parë franceze për fyerje publike.

Një video e filmuar javën e kaluar tregonte Macron në një diskutim prapa skenës së teatrit “Folies Bergère” në Paris bashkë me Ary Abittan, një aktor dhe komedian francez i cili më parë është akuzuar për përdhunim.

Ajo po merrte pjesë në shfaqjen e tij me vajzën e saj dhe disa miq. Një natë më parë, aktivistet feministe kishin ndërprerë shfaqjen, duke bërtitur: “Abittan, përdhunues!”

Macron, 72 vjeçe, e pyeti Abittan se si ndihej. Kur ai tha se ndihej i frikësuar, ajo iu referua protestueseve si “sales connes” (budallaqe të ndyra) dhe tha se nëse ato rishfaqeshin “do t’i hedhim jashtë”.

Juliette Chapelle, një avokate e grupeve feministe që ngriti çështjen, i tha radios “France Inter”: “Ajo është zonja e parë e Francës, fjalët e saj kanë rëndësi.”

Chapelle tha se Macron ishte dukur “shumë e angazhuar në kauzat për gratë, por në realitet mund të themi se ka një shkëputje midis fjalimeve të saj publike dhe asaj që ajo mendon vërtet”.

Magjistratët ndërprenë në vitin 2024 hetimin për akuzën e përdhunimit të ngritur në 2021 kundër Abittan për shkak të mungesës së provave për ta çuar atë në gjyq. Ky vendim u konfirmua në apel në janar të këtij viti.

Grupi i fushatës feministe që mori pjesë në protestën teatrale, Nous Toutes (Të gjithë ne), tha se aktivistët e tij kishin ndërprerë shfaqjen e Abittan për të protestuar kundër asaj që e përshkroi si “kultura e pandëshkueshmërisë” rreth dhunës seksuale në Francë.

“Më vjen keq nëse i kam lënduar gratë viktima”, i tha Macron medias “Brut” këtë javë, duke i quajtur komentet që u kapën në video “komente private”.

Por, ajo shtoi: “Nuk mund të pendohem. Është e vërtetë që jam gruaja e presidentit të republikës, por mbi të gjitha jam vetvetja. Dhe kështu, kur jam privatisht, mund ta lë veten të lirë në një mënyrë që nuk është plotësisht e duhur.”

Mes grupeve feministe që ngritën padinë ligjore ishte edhe “Les Tricoteuses Hystériques” (Thurëset histerike), e cila u themelua në vitin 2024 në kohën e gjyqit më të madh për përdhunim në Francë, në të cilin dhjetëra burra u dënuan për përdhunimin e Gisèle Pelicot, e cila ishte droguar nga ish-burri i saj.

Një avokat mbrojtës në atë rast i quajti gratë jashtë “histerike” dhe “trikoteuse” – duke i krahasuar ato me gratë që shihnin dhe thurnin rroba teksa binte gijotina gjatë Revolucionit Francez.

Numri prej 343 paditësve i referohet një peticioni të vitit 1971 për legalizimin e abortit në të cilin 343 gra thanë se kishin ndërprerë shtatzënitë. Disa personazhe të famshëm kanë shprehur mbështetje për aktivistet feministe të fyera nga Macron duke e përdorur fyerjen me hashtagun #salesconnes.

Aktorja dhe regjisorja Judith Godrèche, një zë kryesor në lëvizjen #MeToo të Francës, e cila ka paraqitur ankesa duke akuzuar dy regjisorë filmash për sulm seksual ndaj saj kur ishte adoleshente, postoi në mediat sociale: “Edhe unë – jam gjithashtu një sales conne (e ndyrë dhe budallaqe) dhe i mbështes të gjitha të tjerat.”