Meta, kompania që zotëron Facebook dhe Instagram, përballet me një nga betejat më të rëndësishme ligjore në historinë e saj. Një gjyq që nis më 18 gusht në SHBA lidhet me akuzat se platformat e saj janë dizajnuar për të mbajtur fëmijët dhe adoleshentët sa më gjatë të jetë e mundur në rrjetet sociale.

Padia është ngritur nga 30 shtete amerikane, të cilat pretendojnë se Meta ka përdorur funksione si njoftimet e vazhdueshme, ‘infinite scroll’, rekomandimet algoritmike dhe sistemi i pëlqimeve për të rritur angazhimin e përdoruesve të rinj, pavarësisht pasojave të mundshme te mirëqenia e tyre.

Shtetet kërkojnë ndryshime të rëndësishme në Facebook dhe Instagram, përfshirë kufizimin e lëvizjes së pafundme të përmbajtjes, heqjen e numrit publik të ‘likes’, kufizimin e njoftimeve dhe masa më të forta për kontrollin prindëror të llogarive të të miturve. Ata kërkojnë gjithashtu dëmshpërblime që mund të arrijnë shifra shumë të larta.

Meta i ka mohuar akuzat dhe thotë se provat do të tregojnë angazhimin e kompanisë për mbrojtjen e të rinjve. Nëse 30 shtetet fitojnë, vendimi mund të sjellë ndryshime të mëdha në mënyrën se si funksionojnë Facebook dhe Instagram në SHBA, duke prekur një pjesë të konsiderueshme të përdoruesve amerikanë.

…