Kam pezulluar tarifat prej 50% ndaj Kanadasë, të cilat ishin planifikuar të hynin në fuqi nesër në mëngjes për një periudhë tre-ditore, duke qenë se Kanadaja dhe SHBA-ja – në pritje të finalizimit të dokumenteve – kanë arritur një marrëveshje,” tha Trump në një postim në rrjetet sociale të martën në mbrëmje.

Tarifat e reja, që preknin dhjetëra produkte – nga shkopinjtë e hokejit e deri te vera – ishin caktuar të hynin në fuqi të mërkurën në orën 00:01 (sipas orës së brendshme amerikane).

Të mërkurën, Trump konfirmoi se kishte pasur një “bisedë shumë të mirë” me kryeministrin kanadez Mark Carney të martën në mbrëmje, duke përsëritur se kishte arritur një marrëveshje për të shmangur, të paktën për momentin, tarifën amerikane prej 50% mbi një sërë produktesh kanadeze.

“Po, patëm një bisedë shumë të mirë me kryeministrin mbrëmë dhe kemi arritur një marrëveshje me Kanadanë. Siç e dini, sot do të hynin në fuqi tarifat e përgjithshme prej 50% ndaj Kanadasë,” tha Trump të mërkurën.

Presidenti pohoi se, si pjesë e marrëveshjes, tarifat kanadeze për produktet bujqësore amerikane do të ishin “in-ekzistente”.

“Tarifat do të jenë in-ekzistente për fermerët tanë. Fermerët tanë paguanin tarifa të jashtëzakonshme për eksportet drejt Kanadasë. Dhe ato tarifa do të eliminohen plotësisht, duke zbritur në zero,” vuri në dukje Trump.

Deklarata më e fundit e Kanadasë për këtë çështje tregon se, ndonëse është bërë “përparim i konsiderueshëm”, mbetet ende punë e rëndësishme për t’u bërë.

“Ndërsa vazhdojmë këtë punë, Kanadaja mbetet e përqendruar te ndërtimi i një ekonomie më të fortë, më të pavarur dhe më konkurruese brenda vendit,” tha Carney në një deklaratë.

Kur më vonë u pyet nga një gazetar nëse marrëveshja do t’i ulte tarifat për çelikun dhe aluminin kanadez, Trump shtoi: “Epo, ne po e shqyrtojmë këtë çështje.”

Zyra e Përfaqësuesit Tregtar të SHBA-së reagoi të martën në platformën X ndaj njoftimit të Trumpit, duke ofruar disa detaje mbi atë që mund të përfshijë një marrëveshje përfundimtare.Marrëveshja do të përfshijë qasje gjithëpërfshirëse në treg për të gjitha mallrat amerikane, angazhime për sigurinë ekonomike, harmonizim të tregtisë dixhitale dhe shumë dispozita të rëndësishme që do të vazhdojnë të mbrojnë tregun tonë dhe punonjësit amerikanë, së bashku me partnerët tanë kanadezë,” njoftoi USTR-ja.