Një tragjedi e rëndë ka tronditur Shtetet e Bashkuara të Amerikës, ku një burrë ka vrarë me armë zjarri tetë anëtarë të familjes së tij, përfshirë katër fëmijë të mitur, përpara se t’i voste flakën shtëpisë dhe të vriste veten. Ngjarja e tmerrshme ndodhi mbrëmjen e së dielës, më 23 Gusht 2026, në qytetin Billings të shtetit Montana.

Autori i kësaj masakre është identifikuar si Alan Smith, 44 vjeç. Sipas dëshmive të familjarëve, Smith ishte një person i mbyllur dhe i fiksuar pas kompjuterit, të cilin prindërit e kishin dëbuar nga shtëpia vetëm pak javë më parë për shkak të konflikteve të vazhdueshme.

Kronologjia e tmerrit gjatë darkës familjare

Sipas rindërtimit të ngjarjes nga autoritetet policore, familja ishte mbledhur për të ngrënë darkë kur 44-vjeçari u kthye papritur në shtëpi i armatosur. Pa asnjë paralajmërim, ai hapi zjarr ndaj të afërmve të tij.

Mes viktimave janë katër fëmijë të pafajshëm:

• Chloe – 7 vjeçe
• Charlotte – 12 vjeçe
• Një fëmijë – 13 vjeç
• Landon – 15 vjeç

Përveç fëmijëve, Smith ekzekutoi gjakftohtësisht edhe prindërit e tij, motrën e vogël, si dhe gjyshen e tij mbi 90-vjeçare, e cila lëvizte me karrocë invalidi.

Vajza 12-vjeçare vdes si heroinë

Mediat vendase dhe policia kanë vlerësuar aktin e guximshëm të Charlotte Ghekiere, 12 vjeçe. Mes breshërisë së plumbave dhe tmerrit, vajza e vogël arriti të ruante qetësinë dhe të telefononte numrin e emergjencës. Ajo njoftoi policinë për atë që po ndodhte përpara se autori ta gjente dhe ta qëllonte për vdekje. Telefonata e saj bëri që forcat e rendit të niseshin menjëherë drejt vendngjarjes.

Autori shkrumboi shtëpinë dhe vrau veten

Pasi kreu ekzekutimet, Alan Smith i vuri flakën shtëpisë me qëllim që të fshihte gjurmët e krimit makabër. Kur shtëpia u rrethua nga forcat e shumta të policisë dhe repartet speciale, autori nuk pranoi të dorëzohej. Në momentin që policia tentoi të ndërhante, 44-vjeçari bëri vetëvrasje me një plumb në kokë. Shtëpia e familjes u shkrumbua plotësisht nga zjarri masiv.

Familja kishte lëvizur kohët e fundit nga Seattle drejt Montanës për një jetë më të qetë. Hetimet e policisë po vijojnë për të zbardhur plotësisht motivet e kësaj ngjarjeje që ka lënë pa fjalë opinionin publik ndërkombëtar.