Rusia po kërkon mbështetje financiare dhe teknologjike nga Kina për ndërtimin e një autostrade strategjike përgjatë Detit Kaspik, pjesë e një projekti prej 40 miliardë dollarësh që synon lidhjen e Moskës me Iranin, Gjirin Persik dhe Azinë Jugore.

Zëvendës kryeministri rus, Marat Khusnullin, deklaroi gjatë Forumit Ekonomik të Kazanit se Moska ka diskutuar me Pekinin mundësinë e përfshirjes kineze në ndërtimin e infrastrukturës, si dhe sigurimin e fondeve për projektin.

Sipas tij, Rusia po shqyrton tërheqjen e kapitalit nga bankat shtetërore kineze dhe nga Banka Aziatike e Investimeve në Infrastrukturë për financimin e segmenteve të autostradës, urave dhe nyjeve lidhëse.

Projekti është pjesë e degës lindore të Korridorit Ndërkombëtar të Transportit Veri-Jug, një iniciativë për të cilën Rusia, India dhe Irani ranë dakord fillimisht në vitin 2000. Rrjeti më vonë u zgjerua në 14 vende anëtare, me synimin për të lidhur Gjirin Persik dhe Azinë Jugore me Evropën përmes territorit rus.

Rruga e planifikuar do të përdorë autostradën federale M6 “Kaspik”, që lidh Moskën me Astrakhanin, për t’u shtrirë më pas përmes Kazakistanit dhe Turkmenistanit drejt porteve iraniane dhe korridoreve tokësore për në Afganistan dhe Pakistan.

Për Rusinë, projekti merr rëndësi strategjike në kushtet kur sanksionet perëndimore dhe lufta në Ukrainë kanë detyruar Moskën të ridrejtojë rrjedhat tregtare larg Evropës.

Para vitit 2022, rreth 40% e eksporteve ruse kalonin përmes vendeve perëndimore, por kjo përqindje kishte rënë në 20-25% deri në vitin 2024.

Në të njëjtën kohë, volumi i transportit përmes Iranit dhe Azisë Qendrore është më shumë se dyfishuar.

Autoritetet ruse synojnë që deri në 80% e mallrave të kalojnë përmes vendeve “miqësore”, ndërsa korridori i ri pritet të reduktojë kohën e transportit të mallrave nga Moska drejt Iranit me 15-20%.