Qendrat polake të rekrutimit kanë filluar t’u dërgojnë qytetarëve karta mobilizimi. Kjo është një procedurë rutinë që kryhet çdo vit për të caktuar specialistë në detyra specifike paraprakisht në rast të një urdhri mobilizimi ose shpërthimit të luftës.

Dokumenti lëshohet në kohë paqeje dhe është menduar vetëm për qëllime informative, sipas RMF24

Kartat u lëshohen kryesisht rezervistëve që u nënshtrohen detyrimeve ushtarake, por ato u dërgohen gjithashtu specialistëve civilë në sektorë kritikë: profesionistëve të shëndetësisë, specialistëve të IT-së, ekspertëve të logjistikës, si dhe punonjësve në sektorët e energjisë, transportit, komunikimit dhe inteligjencës.

Kartela e mobilizimit përmban udhëzime të qarta lidhur me njësinë specifike ushtarake dhe vendndodhjen ku individi duhet të paraqitet menjëherë, por vetëm pasi Polonia të ketë shpallur zyrtarisht mobilizimin ose gjendjen e luftës.

Personat që u nënshtrohen rekrutimit dhe që e shpërfillin këtë detyrim, përballen me dënimin me burgim për një periudhë prej tre vitesh.

Detyrat mund të anulohen nëse individi arrin kufirin e moshës për shërbimin rezervë, shpërngulet përgjithmonë jashtë vendit, dënohet me burgim efektiv ose për arsye shëndetësore.

Shtyrja e shërbimit u jepet gjithashtu prindërve në rastet kur të dy bashkëshortët, që rrisin një fëmijë të mitur, marrin urdhra mobilizimi në të njëjtën kohë.

Caktimet e qytetarëve përcaktohen nga vijat me ngjyra në kartën e mobilizimit. Këto tregojnë llojin e detyrës dhe natyrën e detyrimeve të tyre ndaj ministrisë së mbrojtjes.

Një vijë e kuqe është caktuar për rezervistët të cilët duhet të paraqiten menjëherë për shërbim ushtarak aktiv në një njësi të caktuar.

Një vijë jeshile nënkupton se rezervisti do të thirret përmes një njoftimi të veçantë ose një njoftimi publik.

Vija blu tregon një detyrë mobilizimi civil. Ajo u drejtohet punonjësve të sistemit të mbrojtjes dhe specialistëve civilë, të cilëve u kërkohet që, në rast lufte, të paraqiten në një adresë të caktuar për të kryer punë në mbështetje të nevojave të forcave të armatosura.