TVILIRIA CHICAGO

Fitore e çmendur në baste me goditjet nga këndi: tifozi fitoi 1.2 milionë euro me vetëm 5 euro

Një fitore e jashtëzakonshme, pothuajse e pabesueshme, nga ato që çdo person që luan baste mund t’i ëndërrojë: 1 milion e 200 mijë euro të fituara me një bast prej vetëm 5 eurosh. Një tifoz anglez arriti të fitonte këtë shumë marramendëse pasi parashikoi se 12 ndeshje do të përfundonin me më shumë se 11 goditje nga këndi. Ai vendosi bastin “mbi 11.5” goditje nga këndi për secilën prej 12 ndeshjeve. Një zgjedhje që mund t’ia ndryshojë jetën. Planet e tij për të ardhmen përfshijnë shlyerjen e kredisë së shtëpisë, blerjen e një makine dhe rezervimin e një jave pushimesh me familjen.

Fituesi është një anglez 45-vjeçar, banues në Portsmouth dhe tifoz i Aston Villa. Fundjava kishte nisur mjaft mirë për të, pasi skuadra e drejtuar nga Unai Emery kishte mposhtur Manchester City me rezultatin 2-1 të shtunën në mesditë, duke i shkaktuar kryesueses humbjen e pikëve të para pas shtatë fitoreve në shtatë ndeshjet e para. Por surprizat për tifozin nuk përfunduan aty. Ai arriti të fitonte një bast të kombinuar me 12 ndeshje, për të cilin kompania Betfair ofronte një kuotë prej 249.347 herë shumën e luajtur.

Basti prej 5 eurosh që i ndryshoi jetën

Më duhej ta pyesja gruan nëse shuma në llogari ishte e vërtetë”

“Fillimisht u ndjeva pak keq, ndërsa po përpiqesha të sigurohesha se gjithçka ishte e vërtetë. Më pas e kuptova se çfarë kishte ndodhur. Gruaja ime nuk ishte aty kur kontrollova llogarinë, ndaj më duhej të prisja të kthehej për të konfirmuar shumën. Vazhdoja ta pyesja: ‘Është e saktë, apo jo?’. Nuk më dukej reale dhe është e vështirë ta përshkruaj me fjalë. Nuk kam fjetur shumë natën e kaluar, sepse mendoja se çfarë mund të bëjmë me këto para. Është një ndjesi fantastike, e mrekullueshme!”, tregoi fituesi.

Tifozi zakonisht luan baste të përbashkëta me miqtë, por këtë herë vendosi të provonte i vetëm. “Unë dhe miqtë e mi zakonisht bëjmë një bast të kombinuar në fundjavë, për t’u argëtuar pak. Secili zgjedh një ngjarje dhe e shkruajmë në grupin tonë. Zakonisht parashikojmë që të dyja skuadrat të shënojnë, ndërsa mua më pëlqen të luaj me goditjet nga këndi. Kisha katër paund në llogari, ndaj vendosa të bëja një bast vetëm për vete, me disa goditje nga këndi. Jam i sigurt se do t’u ofroj diçka miqve të mi”, tha ai. 

Fituesi tregoi gjithashtu se nuk e kuptoi menjëherë se kishte fituar. “Nuk e kuptova se kisha fituar deri rreth gjysmë ore pasi përfunduan të gjitha ndeshjet. Jam tifoz i Aston Villa dhe dola me djalin tim për të parë ndeshjen që niste më herët, gjë që e bëri ditën të fillonte në mënyrën më të mirë! Pastaj u kthyem në shtëpi në këmbë dhe u lagëm krejtësisht nga shiu. Kur kontrollova llogarinë, nuk mund t’u besoja syve”.

Betfair e ka paguar tashmë shumën e fituar. Për një kompani të madhe bastesh, një histori e tillë është gjithashtu publicitet i jashtëzakonshëm. “Jemi jashtëzakonisht të lumtur për këtë bastvënës nga Portsmouth dhe nuk mund të ishim më të kënaqur që i kemi paguar një shumë kaq të madhe parash”, deklaroi kompania.