Tensionet janë rritur para Kryeministrisë, pasi disa protestues kanë rrëzuar një dron të përdorur nga efektivët për monitorimin e protestës. Policia ka ndërhyrë me gaz lotsjellës dhe ujë me solucion irritues, ndërsa përmes megafonëve u ka kërkuar protestuesve të ndalojnë veprimet e dhunshme dhe të largohen nga perimetri i godinës.
Ndërkohë, prania policore është përforcuar. Autobotë me ujë janë pozicionuar në të dy krahët e zonës përpara Kryeministrisë, të shoqëruar nga forca të shumta policie. Pas rrëzimit të dronit, ndërhyrja është intensifikuar. Situata vijon të mbetet e tensionuar, ndërsa protestuesit qëndrojnë ende pranë Kryeministrisë.
Protesta është zhvendosur nga zona e Kryeministrisë drejt rrugëve të Tiranës, ndërsa policia ka nisur ndjekjen dhe shoqërimin e disa prej protestuesve. Tensionet janë përqendruar edhe në zonën e “Myslym Shyrit”, ku drejt një autoboti të policisë janë hedhur bomba molotov. Grupe të tjera protestuesish janë shpërndarë në rrugicat përreth për t’iu shmangur ndërhyrjes dhe shoqërimeve.
Zhvendosja vjen pas përplasjeve përpara Kryeministrisë, ku nga turma u hodhën molotovë drejt efektivëve, ndërsa policia ndërhyri me gaz lotsjellës, ujë me presion dhe solucion irritues. Më herët, protestuesit rrëzuan edhe një dron të policisë që po monitoronte tubimin.
Leave a Reply